AES加密解密器

呢個係用Crypto-JS寫出嚟嘅AES(Advanced Encryption Standard)加密器,視乎你條加密鎖匙嘅長度,呢個加密器會用AES-128、AES-192或者AES-256加密。

  • 加密
  • 解密

咩係AES?

AES(Advanced Encryption Standard)其實係個叫Rijindael嘅對稱加密法,佢喺2000年贏咗由美國國家標準技術研究所(NIST)舉辦嘅AES選拔喺2001年正式成為美國聯邦資訊處理標準

因為估算破解需要嘅時間要兩億年,未有人破解過,所以呢個應該係現時最安全嘅對稱加密法。

點解我要用AES加密文件或者對話?

雖然依家所有通訊軟件都有端對端加密(End-to-end encryption),防止傳送出去嘅內容喺傳送過程畀人修改同截獲,但如果你或者同你對話嘅人部電話畀人搶咗,所有內容都會照樣畀人睇晒。

因為噉,如果唔做額外嘅加密,所有通訊軟件,包括Telegram都唔安全。

就算有閱後即焚嘅功能一樣唔安全。如果部電話入咗其他人手嘅時候未到訊息焚毀嘅時限,所有內容都會照樣畀人睇晒。

簡單嚟講,如果唔另外做加密,所有通訊軟件、會留底嘅嘢都係唔安全。

用AES加密同解密

呢個教學會教你點樣用呢個AES對稱加密器加密同解密一段文字。

Step 1: 輸入你想加密嘅內容

喺第一格輸入你想加密嘅內容。

Step 2: 輸入加密鎖匙

喺第二格輸入你想用嚟加密嘅鎖匙,呢條鎖匙越長越好。因為AES係對稱加密法,要用呢條鎖匙先可以解密

Step 3: 獲得加密咗嘅文字

輸入完加密內容同鎖匙之後,第三格就會顯示加密咗嘅文字。

Step 4: 解密

輸入加密咗嘅文字同正確嘅鎖匙之後,就可以睇翻一開頭冇加密嘅字。

English粵文