如果你真係想保管好啲對你好重要嘅嘢，喺屋企整個暗格係個好好嘅選擇。
今次就要教你哋用屋企現有嘅空間做暗格，收埋你嘅秘密。
點樣喺屋企搵做暗格嘅空間呢？
當你喺屋企搵做暗格嘅空間嗰陣，你可以參考以下4點，搵個最隱蔽嘅地方做暗格。
你想收埋嗰樣嘢有幾大？
除咗要度吓你想收埋嘅嘢有幾大，你都應該諗吓可唔可以拆散佢分開收埋。
嗰個空間做暗格明唔明顯？
正常人會懷疑你收埋啲嘢喺個本身設計用嚟裝嘢嘅地方，例如櫃桶，多過懷疑你收埋啲嘢喺本身唔係設計用嚟裝嘢嘅地方。
正常人會懷疑你收埋咗啲嘢喺佢認為係空心嘅地方，多過懷疑你收埋咗啲嘢喺佢認為係實心嘅地方。
只要代入正常人嘅常識去判斷，我哋就可以搵倒啲好唔明顯、普通人唔會諗倒嘅地方做暗格。
你啲手工有幾好？
如果你想自己設計，挑空某啲地方做暗格，一定要有好好嘅手工。整得唔好嘅話，工具嘅刮痕同唔齊口嘅邊好易就會出賣你。
假如你對自己嘅手工冇信心，用你屋企現成嘅空間做暗格會係好啲嘅選擇。
你想收埋嗰樣嘢需要點嘅儲存環境？
你想收埋嗰樣嘢濕唔濕得水？怕唔怕熱？怕唔怕凍？
如果你想收埋嗰樣嘢係用金屬做，你要收埋佢喺啲用金屬做嘅嘢入面，先可以避過金屬探測器。
用你屋企現成空間做暗格嘅4個例子
其實喺我哋屋企入面，有好多我哋冇為意嘅空間，只要做少少改動，就可以將佢哋變做暗格。
睇完下面嘅4個例子之後，你應該可以更加細心噉觀察你屋企每個地方，將啲唔起眼嘅地方變做暗格。
窗簾棍
大部份嘅窗簾棍都係空心嘅，只要擰開窗簾棍上牆嗰啲螺絲，你就可以用佢入面嘅空間做暗格。
如果係浴室用嘅浴簾棍，通常都係用金屬做嘅。就算你放啲用金屬做嘅嘢入去，都唔怕畀人用金屬探測器探測倒。
天花吊燈
因為要駁電線，天花吊燈嘅底座後面一定會有啲空間，嗰啲現成嘅空間就可以用嚟做暗格。只要擰開啲螺絲，就可以放嘢入去。
留意唔好放啲怕熱同太重嘅嘢入去。
門
如果你屋企道門係空心，你嘅手工又夠好，你可以挑空門頂部啲木，將成道門變做暗格。
你屋企道門係油壓門嘅話，你都可以擰開門頂油壓嘅螺絲，再放嘢入去。
電掣
同天花吊燈一樣，因為要駁電線，每個電掣後面其實都收埋咗啲空間。只要打開電掣個蓋，嗰度就可以當現成嘅暗格噉用。
如果你有時間同手工，你都可以自己整個假嘅電掣做暗格。
記得喺扭開電掣個蓋之前，閂咗你屋企嘅總掣先。
