點樣可以用碘酒淨化食水呢?

點樣可以用碘酒淨化食水呢

水係人類生存最重要嘅一樣物資,我哋只要冇水飲三日就會死。

喺災難發生嘅時候,所有資源都非常珍貴。唔單止水嘅供應未必夠,而且煲水用嘅電同燃料都可能冇。

直接飲啲未淨化嘅水係最差嘅選擇。萬一你中咗啲同水有關嘅病,例如霍亂,你就要畀人照顧,成為負累。

喺呢啲噉嘅情況下,到底我哋自己有咩方法可以淨化食水呢?

今次就用美軍訓練手冊FM 21-76,教大家點用碘酒淨化食水。

碘酒可以淨化食水嘅原理

淨化食水係為咗殺死水入面嘅病原體,防止自己感染啲同水有關嘅病,例如霍亂。平時我哋煲水,就係用熱力去達到呢個目的。

化學品可以打破水入面病原體細胞嘅離子平衡(Ionic Balance),殺死佢哋,呢個過程稱為化學淨化。一般會用碘(Iodine)或者氯(Chlorine)呢兩種化學成份嚟淨化食水,而碘酒入面就有碘呢個成分。

雖然碘可以殺死晒水入面嘅細菌同病毒,但佢唔可以殺死所有寄生蟲,例如係對碘抵抗力強嘅cryptosporidium。

如果你懷疑啲水有寄生蟲,你需要再過濾咗啲水先好飲,或者揀其他乾淨啲嘅水源。

喺香港我點解要用碘淨化食水?

煲水係最好嘅淨化食水方法,但唔係幾時我哋都可以噉樣做。

行山或者露營嗰陣,煲水係件好浪費、好奢侈嘅事。唔單止會消耗燃料,而且重會霸住咗你一個爐頭,煮唔倒其他嘢食。

再講用碘酒淨化你可以一路行一路做,煲水就要坐喺度等佢滾。除非你係要熱水,如果唔係做咩要咁蠢呢?

香港嘅水喉水喺水廠已經有消毒過,有寄生蟲嘅機會好微。只要喺行山徑附近嘅公廁攞水喉水,用碘酒淨化食水就好安全。

識得用呢個方法,下次行山露營就可以帶少啲水,減低負重。

大金鐘 馬鞍山

飲用碘酒淨化嘅水嘅注意事項

如果你對甲殼類食物有敏感,你都有可能對碘敏感,應該避免飲用碘酒淨化嘅水。

另外小朋友、大肚婆同甲狀腺有問題嘅人,都應該避免飲用碘酒淨化嘅水。

最後,任何人都唔應該連續十四日飲用碘酒淨化嘅水。

一個水樽

一樽碘酒

用碘酒淨化食水

呢個教學會教你點用碘酒淨化食水。

Step 1: 準備容器

準備一個水樽裝住你想淨化嘅水。

Step 2: 加入適當份量嘅碘酒

按照水嘅容量落碘酒。根據美軍訓練手冊FM 21-76,每公升水落五滴2%濃度嘅碘酒。如果本身啲水好濁,每公升落十滴碘酒。

Step 3: 等碘酒發揮化學反應消毒

畀至少三十分鐘碘酒殺死水入面嘅病原體,之後就飲得。

FAQs

我應該用幾多碘酒去淨化啲水呢?

根據美軍訓練手冊FM 21-76,每公升水落五滴2%濃度嘅碘酒。如果本身啲水好濁,每公升落十滴碘酒。

用碘酒淨化食水要等幾耐呢?

落咗碘酒之後,大概需要等三十分鐘。

有冇方法可以冚咗水入面碘酒嘅味道?

你可以落啲維他命C片,中和啲味道。

有冇人係唔適合飲用碘酒淨化嘅水?

如果你對甲殼類食物有敏感,你都有可能對碘敏感。另外小朋友、大肚婆同甲狀腺有問題嘅人,都應該避免飲用碘酒淨化嘅水。

參考資料

    留言

    留言唔會公開你嘅電郵地址。

    English粵文