到底醋可唔可以代替酒精消毒殺菌呢?

醋可唔可以代替酒精消毒殺菌呢

災難嚟臨,個個都會搶啲特別有用嘅物資。今次武漢肺炎,就令全香港嘅消毒劑、酒精、火酒、漂白水全部賣清。

想成為任何災難之下,點攬炒都可以自保嘅生存專家,一定要識點自製自己需要嘅物資,或者搵啲周圍都有但唔顯眼嘅替代品。到底有冇嘢可以代替呢啲化學消毒劑,消毒殺菌呢?

醫學界喺二十世紀初,就發現有酸性嘅有機化合物(Organic acid)可以殺菌。日常生活中,我哋最容易買倒,又有呢啲成份嘅,就係醋。

到底醋可唔可以代替酒精消毒殺菌,預防武漢肺炎呢?

醋本身有咩成分可以殺菌㗎?

醋入面同殺菌有關嘅成分有乙酸(Acetic Acid)同丙酸(Propionic Acid)。乙酸本身係乙醇(即係酒精)經過發酵之後嘅產物(CH3CH2OH + O2 → CH3COOH + H2O)。

每一種醋都有一定份量嘅乙酸,但未必有丙酸。正常食用嘅醋,乙酸濃度大概係3%至7%,丙酸濃度大概係0.1至0.5%

醋可以殺死啲咩細菌同病毒㗎?

根據美國微生物學會刊登嘅研究,醋入面嘅乙酸同丙酸可以好有效噉殺死大部份細菌。根據佢哋實驗,用6%乙酸濃度嘅醋消毒,再等三十分鐘之後,可以殺死結核桿菌(Mycobacterium tuberculosis),同大幅度減少其他頑強啲嘅細菌,例如抗藥性非常強嘅非結核性分枝杆菌(M. massiliense nontuberculous mycobacteria)。

除咗細菌,醋重可以殺死真菌。根據醫學期刊Journal of Applied Oral Science嘅研究,用醋浸洗假牙,可以殺死同阻止一系列嘅真菌生長,包含白色念珠菌(C. albican)、葡萄牙念珠菌(C. lusitaniae)同近平滑念珠菌(C. parapsilosis)。

醋亦都可以殺死同阻止普通廚房同浴室有嘅黴菌、大腸桿菌同沙門氏菌生長。

醋可唔可以殺死武漢肺炎病毒呢?

醋可以殺死細菌同真菌,但到依家為止,仍然未有文獻指出單純用醋可以殺死病毒。

雖然有研究發現醋溝埋其他清潔劑消毒,可以令到H1N1流感病毒變得唔活躍,但冇足夠嘅化學知識溝化學品,係一件好危險嘅事。

如果你將醋同漂白水溝埋一齊,就會產生氯氣,喺室內絕對會毒死自己。

氯就係一戰時候雙方用嘅毒氣。

FAQs

所有醋都可以消毒殺菌?

係。醋入面乙酸嘅濃度愈高,消毒效果愈強。一般醋嘅乙酸濃度係5%。

醋可以殺死咩菌?

根據研究,醋可以殺死或阻止大部份細菌同真菌生長,包括大腸桿菌同沙門氏菌。

醋殺唔殺得死武漢肺炎病毒?

莫講話武漢肺炎病毒,暫時未有單純用醋殺死病毒嘅文獻記錄。

用醋消毒要幾耐先可以完成?

根據美國微生物學會刊登嘅研究,5%乙酸濃度嘅醋要30分鐘先可以完成消毒。乙酸濃度愈高,消毒速度愈快。

參考資料

    留言

    留言唔會公開你嘅電郵地址。

    English粵文中文 (台灣)