用法拉第袋反跟蹤

用法拉第袋反跟蹤

跟蹤主要有物理同電子跟蹤兩種,為咗唔好畀人用我哋身上面發出嘅信號跟蹤我哋,唔帶會發出信號電子產品,例如電話出街,係其中一種反跟蹤嘅方法。

但如果真係要帶電話出街,噉又可以點做呢?

今次就要教大家用法拉第袋(Faraday bag)反跟蹤,防止你部電話發出可以畀人跟蹤嘅信號。

咩係法拉第袋?

Mission Darkness 嘅法拉第袋
Mission Darkness 嘅法拉第袋

法拉第袋係個用金屬片覆蓋嘅袋(通常金屬片會縫喺布同布中間,防止生銹),用嚟阻隔袋入面同外面嘅電磁波。

法拉第袋同法拉第籠嘅運作原理一樣,包住佢哋嘅金屬喺接觸電磁場嘅時候,會產生靜電感應(Electrostatic Induction),令袋入面嘅物件唔受電磁場影響

因為噉,法拉第袋就可以阻止袋入面嘅電子產品接收同發出信號(袋入面嘅電子產品會照樣發出信號,但袋出面唔會接收倒),達到反跟蹤嘅效果。

法拉第袋可以遮擋嘅電磁波取決於佢嘅金屬片用料,市面上嘅法拉第袋主要係用銀、鋁或者銅片做隔層,可以擋倒電話(2G、3G、4G)、Wi-Fi、藍牙、GPS、紅外線、NFC同部份無線電嘅信號。

因為法拉第袋可以阻止袋入面嘅電子產品發出同接受信號,除咗可以反跟蹤之外,亦都可以防電磁脈衝嘅攻擊(EMP)

法拉第籠
法拉第籠

用法拉第袋可以點反跟蹤?

當你懷疑畀人跟蹤,你要假設對方用晒物理同電子兩種方法跟蹤你。放你身上可以發放同接收信號嘅電子產品入法拉第袋,確保對方唔可以用信號跟蹤你,再嘗試擺脫物理跟蹤。

你亦都可以喺法拉第袋放第二部平時唔會用嘅電話,緊急嘅時候先用,確保跟蹤你嘅人唔知嘅情況下,聯絡其他人或者上網。

幾張錫紙、一個袋仔

自製法拉第袋

呢個教學會教你點樣用錫紙自製法拉第袋。

Step 1: 固定金屬隔層

將幾張錫紙放入一個袋仔入面,覆蓋晒成個袋,再用膠紙或者其他方法固定。金層隔層越厚,電磁波就越難穿過去。

Step 2: 測試

放部電話入去個袋度再閂實個袋,再試吓打電話、send message過去。如果部電話完全冇反應,而喺攞翻出嚟之後收倒你頭先send過去嘅message,就算成功。

FAQs

咩係法拉第袋?

法拉第袋係個用金屬片覆蓋嘅袋(通常金屬片會縫喺布同布中間,防止生銹),用嚟阻隔袋入面同外面嘅電磁波。

法拉第袋可以阻擋邊啲信號?

視乎做嗰個袋嘅物料,法拉第袋可以擋電話(2G、3G、4G)、Wi-Fi、藍牙、GPS、紅外線、NFC同無線電嘅信號。

我可唔可以自製法拉第袋?

最簡單自製法拉第袋嘅方法係放幾層錫紙入個好細、可以密封嘅袋度做金屬隔層。

參考資料

    留言

    留言唔會公開你嘅電郵地址。

    English粵文