準備你自己嘅求生包——理論篇

準備你自己嘅求生包

生存除咗需要意志同技術之外,裝備都好緊要。如果你預先有準備,就唔使喺災難發生嘅時候同其他人爭物資。

今次就根據美軍訓練手冊FM 21-76教吓大家咩係求生包、點解要準備求生包同求生包入面應該要有啲咩。

美軍訓練手冊FM 3-05.70係FM 21-76嘅增訂版,2002年出版
    準備求生包
  • Part 1: 準備你自己嘅求生包——理論篇

咩係求生包?

求生包(Survival kit)係個為咗應對災難或者危機,事先準備好嘅裝備袋,入面嘅裝備可以幫我哋滿足基本嘅生存需要。

我哋應該視乎計劃應對嘅危機、生存環境同時間,準備有唔同裝備嘅求生包。

點解要準備求生包?

所有珍貴嘅資源都係有限嘅。如果喺災難發生嘅時候你先去準備呢啲生存裝備,你就要同其他冇準備嘅人一齊爭,而往往呢班人都係大多數,你買唔倒係好正常。

就好似今次嘅武漢肺災,如果你冇一早買定口罩,你就要捱貴口罩,甚至連口罩都冇得用。

除此之外,事先準備求生包可以令你比一般人更加識分邊啲係有用嘅資源,呢啲知識喺災難發生嘅時候先學就太遲。

例如普通人唔會知碘酒除咗可以消毒傷口之外,重可以用嚟淨化食水

有越多知識同裝備,你要生存就越容易。

求生包應該有啲咩?

求生包入面嘅裝備唔應該只係解決你短暫嘅需要,而係應該幫你自給自足一段時間。

根據美軍訓練手冊FM 21-76,求生包最起碼要有解決起火、食水、食物、藥物、避難所、發出信號呢六個需要嘅裝備,再跟據唔同生存環境同需要準備額外嘅裝備。

人生存一定要有食水同食物,呢兩樣係最重要嘅物資。

火除咗可以用嚟煮嘢食,重可以幫我哋保溫,減少水份消耗,更重要嘅係可以提升我哋嘅士氣。

解決咗基本飲食之後,就要諗避難所嘅問題。喺野外冇遮冇掩,會產生好多唔同問題,例如雨同蟲。

藥物可以確保你受傷、發炎同中毒嘅時候有及時嘅治理。

最後,有發出信號嘅裝備,你可以容易啲畀嚟支援你嘅人發現你。

美軍S.E.R.E求生包
美軍S.E.R.E求生包

FAQs

咩係求生包?

求生包(Survival kit)係個為咗應對災難或者危機,事先準備好嘅裝備袋,入面嘅裝備可以幫我哋滿足基本生存需要。

點解我哋要準備求生包?

所有珍貴嘅資源都係有限嘅,如果你冇事先做好準備,你就要喺災難發生嘅時候同其他人一齊爭。

除此之外,事先準備求生包可以令你比一般人更加識分邊啲係有用嘅資源

求生包入面應該有啲咩?

根據美軍訓練手冊FM 21-76,求生包最起碼要有解決起火、食水、食物、藥物、避難所、發出信號呢六個需要嘅裝備,再跟據唔同生存環境同需要準備額外嘅裝備。

參考資料

    留言

    留言唔會公開你嘅電郵地址。

    English粵文