參考美國同歐洲標準,揀款抵擋武漢肺炎、催淚彈同橡膠子彈嘅眼罩

Learn how to pick safety goggles that protect you from tear gas, rubber bullets, Wu Han Virus and more based on ANSI Z87.1-2015 and EN166, EN169, EN170, EN171 and EN172.

災難嚟臨,社會失去秩序嘅時候,每個人都需要保護自己。有足夠嘅裝備,你會面對嘅危險就會少啲。

除咗冷兵器之外,喺香港你有機會面對實彈、催淚彈、橡膠子彈、戰術電筒嘅強光同汽油彈嘅攻擊,呢啲攻擊全部都可以傷害你對眼。

病毒,例如武漢肺炎,可以經眼嘅黏膜感染你。如果炎難發生嗰陣有埋瘟疫,有個可以保護自己嘅眼罩非常之重要。

今次就要教大家參考美國標準ANSI Z87.1-2015同歐洲標準EN166、EN169、EN170、EN171同EN172,揀款可以抵擋武漢肺炎、催淚彈、橡膠子彈同強光嘅眼罩。

揀副防催淚彈嘅眼罩

催淚彈所釋放嘅唔係氣體,而係微粒。如果要抵禦催淚彈影響雙眼,你要揀副可以遮擋細過5微米微塵嘅眼罩。

參考美國標準,D3標記代表嗰個眼罩可以抵擋一般液體,D4標記代表嗰個眼罩可以抵擋大過5微米嘅微塵,D5標記代表嗰個眼罩可以抵擋細過5微米嘅微塵。

所以,要完全隔絕催淚彈釋放嘅微粒,你需要用有D5標記嘅眼罩,例如Z87 D3 D4 D5(有D5,自然有D3 D4)。

參考歐洲標準,EN166嘅3號標記,4號標記代表嗰個眼罩可以抵擋大過5微米嘅微塵,5號標記代表嗰個眼罩可以抵擋細過5微米嘅微塵。

因為噉,要完全隔絕催淚彈釋放嘅微粒就要揀有EN166 5號標記嘅眼罩(例如EN166 3 4 5 9)。

中大之戰

揀副防武漢肺炎嘅眼罩

除咗口同鼻之外,眼都係感染武漢肺炎病毒嘅途徑。病毒經飛沫同空氣傳播接觸倒你眼嘅黏膜,就會傳染你。

你想防止經空氣傳播感染武漢肺炎,你要揀副可以遮擋細過5微米微塵嘅眼罩。參考美國標準,副眼罩要有D5標記(例如Z87+D3 D4 D5);參考歐洲標準,副眼罩要有EN166嘅5號標記(例如EN166 3 4 5 9 BT)。

如果你只係想防止經飛沫傳播感染武漢肺炎,你只需要揀副可以遮擋液體嘅眼罩。參考美國標準,副眼罩要有D3標記(例如Z87+D3);參考歐洲標準,副眼罩要有EN166嘅3號標記(例如EN166 3)。

揀副防橡膠子彈嘅眼罩

量度一粒子彈嘅威力,要有佢嘅重量同飛行速度(槍管長度會影響飛行速度,一般武器生產商測試時候用嘅係24寸嘅槍管)。香港警察用嘅其中一款橡膠子彈,ALS 1202嘅重量係9克,飛行速度係每秒152米

假設係由24寸嘅槍管發射,ALS 1202 嘅威力有105焦耳。

香港警察用嘅橡膠子彈
香港警察用嘅其中一款橡膠子彈,ALS 1202。

參考美國標準,防衝擊嘅工業用眼罩會有+號標記。要攞Z87+認證,眼罩要通過兩個測試。首先佢要抵受一件500克,喺1.3米高垂直跌落去嘅圓錐體撞擊而冇損壞。呢舊圓錐體跌落去嘅速度大概有每秒5.049米,能量有6.4焦耳。

眼罩重要抵受大概1.05克嘅鋼珠喺唔同距離發射,用每秒76米嘅速度撞擊而冇損壞。粒鋼珠嘅能量大概3焦耳。

參考歐洲標準,防衝擊嘅工業用眼罩最高標準係EN166嘅A標記(例如EN166 A)。要攞EN166嘅A標記,眼罩要抵受0.86克嘅鋼珠喺唔同距離發射,用每秒190米嘅速度撞擊而冇損壞。粒鋼珠嘅能量有15.5焦耳。

無論係美國定歐洲標準民用眼罩嘅防護力,都遠遠比唔上橡膠子彈嘅威力,只可以減低傷害。

如果真係要防橡膠子彈,就需要用達到美國軍用標準MIL-PRF-32432或者MIL-DTL-43511D嘅眼罩。

ESS Striketeam SJ係一款通過MIL-DTL-43511D測試嘅眼罩。

FAQs

如果我想揀副防催淚彈嘅眼罩,副眼罩應該要符合咩標準?

你要揀副可以遮擋細過5微米微塵嘅眼罩。參考美國標準 Z87.1-2015,副眼罩要有D5標記(例如Z87+D3 D4 D5);參考歐洲標準,副眼罩要有EN166嘅5號標記(例如EN166 3 4 5 9 BT)。

如果我想揀副防武漢肺炎嘅眼罩,副眼罩應該要符合咩標準?

如果你想防止經空氣傳播感染武漢肺炎,你要揀副可以遮擋細過5微米微塵嘅眼罩。參考美國標準 Z87.1-2015,副眼罩要有D5標記(例如Z87+D3 D4 D5);參考歐洲標準,副眼罩要有EN166嘅5號標記(例如EN166 3 4 5 9 BT)。

如果你只係想防止經飛沫傳播感染武漢肺炎,你只需要揀副可以遮擋液體嘅眼罩。參考美國標準 Z87.1-2015,副眼罩要有D3標記(例如Z87+D3);參考歐洲標準,副眼罩要有EN166嘅3號標記(例如EN166 3)。

如果我想揀副防橡膠子彈嘅眼罩,副眼罩應該要符合咩標準?

參考美國標準 Z87.1-2015,防衝擊嘅工業用眼罩最高標準係+標記(例如Z87+); 參考歐洲標準,防衝擊嘅工業用眼罩最高標準係EN166嘅A標記(例如EN166 A)。

無論係美國定歐洲標準民用眼罩嘅防護力,都遠遠比唔上橡膠子彈嘅威力,只可以減低傷害。如果真係要防橡膠子彈,達到美國軍用標準MIL-PRF-32432或者MIL-DTL-43511D嘅眼罩先至適合。

如果我想揀副防強光嘅眼罩,副眼罩應該要符合咩標準?

參考美國標準 Z87.1-2015,副眼罩要有L標記,L1.3最弱,L10最強(例如Z87+ D3 D4 D5 L3);參考歐洲標準,副眼罩要有EN172 5 或者6號標記(例如EN166 3 EN172 6),5號唔可防埋紅外線,6號可以。

如果我想揀副燒焊用嘅眼罩,副眼罩應該要符合咩標準?

參考美國標準 Z87.1-2015,副眼罩要有W標記,W1.3最弱,W14最強(例如Z87 W3);參考歐洲標準,副眼罩要有EN175嘅認證(例如EN166 3 EN175)。

如果我想揀副防紅外線嘅眼罩,副眼罩應該要符合咩標準?

參考美國標準 Z87.1-2015,副眼罩要有R標記,R1.3最弱,R10最強(例如Z87 R1.3);參考歐洲標準,副眼罩要有EN171嘅4號標記(例如EN166 3 EN171 4)。

如果我想揀副防紫外線嘅眼罩,副眼罩應該要符合咩標準?

參考美國標準 Z87.1-2015,副眼罩要有U標記,U2最弱,U6最強(例如Z87 U3);參考歐洲標準,副眼罩要有EN170嘅2、2C或者3號標記(例如EN166 3 EN170 2)。

參考資料

    留言

    留言唔會公開你嘅電郵地址。

    English粵文